Problemløysing
Rett opningsreplikk, behovsavklaring og argumentasjon er viktig, men det er også andre ting å tenkje på for ein sals- og servicemedarbeidar. Les dømet nedanfor og forklar kva som kunne vore gjort annleis.
Ein kvinneleg kunde – la oss kalle henne Sandra – kjem inn i eit varehus som sel byggjevarer. Ho treng hjelp til å finne nokre spesielle dørhandtak og leitar etter nokon å spørje. Ho får auge på ein som ser ut som om han jobbar på varehuset, og spør han. Men han seier at han jobbar på trelasta og derfor ikkje kan hjelpe henne. Ho går til ein som sit i kassa, og spør kvar ho kan få hjelp. «Eg har ikkje noko med kundebehandling å gjere», seier han. «Du får prøve i interiøravdelinga.» I interiøravdelinga er det to andre kundar som ventar på tur til å bli ekspedert, og det tek si tid. Da det endeleg bli turen til Sandra, seier kundebehandlaren at ho må ta ein telefon, og så forsvinn ho og kjem ikkje att før det har gått 15 minutt. Men da har Sandra for lengst gitt opp og gått frå butikken. Eit tapt sal og kanskje ein tapt kunde.