Sjølv om dette ikkje har direkte med verdikjeda å gjere, viser denne teksten kor viktig logistikken er for mange bedrifter, og kanskje særleg for bedrifter som driv med transport. Teksten viser også at god logistikk betyr god service (jf. kapittel 4).
«I Tide Bud og Transport», som vart etablert i 2008, har dei siste åra opplevd ein stor omsetningsauke. Veksten kjem først og fremst av overgangen til eit nytt logistikksystem og nye bodbilar med løftelem.
Kravet til gode logistikkrutinar er avgjerande for at selskapet skal vekse vidare. Derfor vedtok selskapet å skaffe seg eit nytt transportadministrativt system. Før dei gjorde det, var befraktarane hos «I Tide Bud og Transport» opptekne med telefonsamtalar frå tidleg om morgonen til seint på kveld. All oppdragsinformasjon vart notert ned på post-it notatblokker, som så vart følgt opp manuelt. Arbeidsprosessen var tidkrevjande og førte til mykje stress. Med det nye systemet UniTrans har selskapet gått bort frå «steinalderverktøy» og over til bruk av eit moderne datasystem.
UniTrans inneheld mellom anna ordreregistrering og fleire ordretorg. I eit av torga kjem det inn elektroniske bestillingar (edi) som kundane legg inn i KundeWeb eller via andre logistikksystem. Med det nye systemet skjer 60–70 prosent av ordrane elektronisk.
KundeWeb gjer at kundane får større kontroll med oppdraga frå A til Å. Her gjer dei registrering og søkjer på historikk og prisinformasjon per oppdrag. Dette reduserer feil og misforståingar som det lett kan bli når ordrebestillingar skjer over telefon. Selskapet slepp å bli oppringt i tide og utide om oppdragsstatus. «I Tide Bud og Transport» opplyser at kundane verdset KundeWeb-løysinga høgt, og at det aukar servicegraden og kvaliteten på framføringa av gods.
For å tilfredsstille krava frå kundane om leveranse til rett tid har «I Tide Bud og Transport» teke i bruk ein app frå selskapet Hogia. Appen gir oversikt over lasteutnyttinga på bodbilane og når varene blir leverte til kundane. Det er også mogleg å følgje vara frå ho forlèt rampa, til ho er framme hos mottakaren. Når kunden tek imot vara, signerer han for motteken ordre i displayet i den handhaldne terminalen. Oppdraget blir samstundes overført elektronisk til back-office-systemet til transportselskapet, som omgåande sender ut faktura. Samstundes blir informasjonen tilgjengeleg i KundeWeb. Her kan kunden sjå på tidspunkt for levering med signatur.